ഇവിടെ സുനിശ്ചിതമേവര്‍ക്കും:
'മൃതിപുണരും നാമേവരെയും'!
സ്മൃതിയിലതുണരാറില്ലാര്‍ക്കും
ഇവിടെയിതാണത്യാശ്ചര്യം!!
ജനിമൃതികളുടെയര്‍ഥം നാം
അറിയുന്നുണ്ടെന്നതു സത്യം
മിഴിയില്ലെങ്കില്‍ കതിരവനീ
കിരണശതംകൊണ്ടെന്തര്‍ഥം?
മഴവില്ലിന്റെ നിറങ്ങളിലും
സുമശതവര്‍ണശതങ്ങളിലും
അഴകുള്ളതു കാണാന്‍ മിഴിയും
മിഴിയുള്ളവനും വേണ്ടായോ?
മനുജന്നഴകതു കാണാനായ്
മിഴിയരുളുന്നൊരു ദൈവം തന്‍
മിഴിയതു നമ്മുടെയാത്മാവില്‍
മിഴിയും നിമിഷം കാക്കുന്നോന്‍!
മനുജര്‍ ദൈവസുതര്‍, ജന്മം
ദൈവാനന്ദമറിഞ്ഞിടുവാന്‍
അപരന്‍ പരനെന്നറിയുമ്പോള്‍
അറിയുവതാണാ ആനന്ദം!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ