അര്‍ഥമേ വ്യര്‍ഥമെന്നാരോമൊഴിഞ്ഞിടു-
ന്നര്‍ഥത്തിനര്‍ഥമെ?ന്തെന്റെ ചോദ്യം!
ധര്‍മാര്‍ഥം കാമവും മോക്ഷാര്‍ഥമെന്നെന്നൊ-
ടര്‍ഥാന്തരാന്വേഷി ചൊന്നിടുന്നു!
ധര്‍മാര്‍ഥമര്‍ഥാര്‍ഥം കാമമോ മോക്ഷാര്‍ഥം-
ഓതുന്നതാരാണ്? കേട്ടതെന്ത്?
അര്‍ഥാന്തരങ്ങളിലല്ല, മോക്ഷാര്‍ഥത്തി-
ലാണു തേടേണ്ടതര്‍ഥാര്‍ഥമെന്നും!
നാമപ്രിയന്‍ നീ, നിനക്കെത്ര പേരുകള്‍
നീ സ്വയം കണ്ടെത്തി? അര്‍ഥാന്തരന്യാസ-
മായിരമായിരം രശ്മിജാലങ്ങളില്‍
ആത്മാവിനര്‍ഥം തിര;ഞ്ഞിരുള്‍ക്കൂനയില്‍
ചാരത്തിനുള്ളില്‍ പുതഞ്ഞുകിടന്നിടും
ഇപ്പൊരി, തീപ്പൊരി, രശ്മികളൊക്കെയും
ചേര്‍ന്നാല്‍ നിറങ്ങളല്ലീ വെണ്മമാത്രമാ-
ണെന്നറിയിച്ചോരറിവിലെത്തിക്കവെ
നിത്യചൈതന്യമേ, സത്യചൈതന്യമായ്
നാമപ്പൊരുള്‍ നിലാവായി മാറുന്നിതാ!
