Follow by Email

2012, ജനുവരി 13, വെള്ളിയാഴ്‌ച

സീനേര്‍ജി! സീനേര്‍ജി! സീനേര്‍ജി!


സീനേര്‍ജി!


സീനേര്‍ജി! സീനേര്‍ജി! സീനേര്‍ജി!                          
ദൈവേച്ഛയില്‍ സ്വേച്ഛ ചേര്‍ത്തുവച്ച്
സന്തോഷം പങ്കുവച്ചൊത്തുചേര്‍ന്ന്
സര്‍വരുമുണരവെ സീനേര്‍ജി!

റെയ്കി, കീ, ചീ, പ്രാണന്‍, യിന്‍ -യാങ്ങ്,
പ്രകൃതി-പുരുഷന്‍, ജൈവോര്‍ജം
ഇവയുടെ പൊരുളൊന്നെന്നറിയുന്നവര്‍
ഒരുമിച്ചീടവെ സീനേര്‍ജി!

സ്വയമറിയുക നാം, സ്വയമുണരുക നാം,
സ്വന്തമുണര്‍വിലുണര്‍ത്തുക നാം:
ഉണരുന്നവരൊരുമിച്ചൊരു പൊരുളില്‍
സ്വയമര്‍പ്പിക്കവെ, സീനേര്‍ജി!

അറിവായറിവിന്‍ നിറവായ്, നെറിവായ്,
അരുളായ് സ്വയമിങ്ങറിയുക നാം.
ഇവിടീ നിമിഷമറിഞ്ഞീടുന്നതി-
ലൊഴുകവെയല്ലോ സീനേര്‍ജി!

ഇന്നലെ, നാളെയിതൊന്നിലുമില്ലി-
ല്ലിന്നിന്‍ പൊരുളാം യാഥാര്‍ഥ്യം.
ഇന്നീ നിമിഷമുണര്‍ന്നുള്‍പ്പൊരുളായ്
അന്യരെയറിയവെ സീനേര്‍ജി!

ഇല്ലില്ലന്യത, അപരന്‍ പരനായ്
നമ്മില്‍ സ്‌നേഹമുണര്‍ത്തുന്നോന്‍ .
സ്‌നേഹമുണര്‍ത്തും ശാന്തിയിലല്ലോ
ധന്യത പകരും സീനേര്‍ജി!

അണ്ഡകടാഹവുമണുവുമടങ്ങിടു-
മിടമാണറിവെന്നറിയുക നാം.
അപരനുമകലവുമതിലില്ലകമേ
ഒരു കരുണക്കടല്‍ - സീനേര്‍ജി!!

2012, ജനുവരി 5, വ്യാഴാഴ്‌ച

ആത്മഭാഷണം: പൂജ്യന്‍ ഞാന്‍

പൂർണമദ: പൂർണമിദം..എന്ന് തുടങ്ങുന്ന  

ഉപനിഷദ്മന്ത്രം മലയാളത്തിലേക്ക് പരിഭാഷപ്പെടുത്താൻ 
ശ്രമിച്ചതിന്റെ ഫലമാണിത്.   

പൂര്‍ണതയ,ങ്ങിങ്ങുമുള്ളതെല്ലാം
പൂര്‍ണതതന്നെയാണെന്നറിഞ്ഞ്
പൂര്‍ണത്തില്‍നിന്നുത്ഭവിപ്പതെല്ലാം 
പൂര്‍ണതതന്നെയാണെന്നറിഞ്ഞ്

പൂര്‍ണത്തില്‍നിന്നു പൂര്‍ണം കിഴിച്ചാല്‍ 
പൂര്‍ണത ശേഷിക്കുമെന്നറിഞ്ഞ് 
സംസാരസാഗരത്തുള്ളിതന്നെ 
സംവിത്തിന്‍ തുള്ളിയുമെന്നറിഞ്ഞ്

ജീവിതാര്‍ഥം നിത്യസത്യമായു-
ണ്ടിന്നിലെന്നുള്ളരുളായറിഞ്ഞ്
ഞാനല്ല, ജ്ഞാനത്തിനുള്‍പ്പൊരുളാം
ആകെയിങ്ങുള്ളതിലെന്നറിഞ്ഞ്
പൂര്‍ണത മായയല്ലെന്നറിഞ്ഞ്
മായയും ഭാവപ്രഭാവമാണെ-
ന്നുള്ളതിനുള്‍പ്പൊരുള്‍ കണ്ടറിഞ്ഞ് 
മുക്തിയിലാം ശക്തിയെന്നറിഞ്ഞ്

വേദവേദാന്തപ്പൊരുളറിഞ്ഞാല്‍
ജീവിതത്തിന്നരുളെന്നറിഞ്ഞ് 
നാം പുഴയായൊഴുകീടുമെങ്കില്‍
ആഴിയായ് മുക്തിയെന്തെന്നറിയും!

ആത്മഭാഷണം: പൂജ്യന്‍ ഞാന്‍:

'via Blog this'