എഴുത്ത്

 ഒരു യാന്തികത്വം നിനക്കുണ്ടതോർക്കണം

അതു നിന്റെ ചൈതന്യമല്ല നിൻ പാശമാ-

ണതു ബന്ധനം, മുക്തനാകണം, ധ്യാനവും

ഒരു പാശമായിടാമെന്നറിഞ്ഞീടുക!

എഴുതുകയൊഴുക്കിലാം ധ്യാനം, വിവേകമാ-

ണൊഴുകവെ ജലത്തിൽ ലയിക്കാതിരിക്കലിൽ

നിഴലിടുവതെന്നറിഞ്ഞാർദ്രനായാത്മാവി-

ലൊഴുകുവതെഴുത്തിൽ ലയം, നീയതാകുക!

ദിവസവും രാവിലെ ഇരുപതു മിനിറ്റുണർ-

ന്നിതുപോലെയെഴുതുക,യതാണുനിൻ ധ്യാന, മീ-

ഹൃദയലയലാസ്യസങ്കീർത്തനം ഒഴുകവെ

എഴുതുകയെഴുത്താണു നിന്നൊഴുക്കോർക്കുക!

എഴുതുക,യെഴുത്തിലാം നിൻ കഴു,ത്തതു നിന്റെ

തല ഹൃദയമോടു ചേർക്കുന്ന പാശം, പശുവു-

മയവിറക്കും തിന്നതൊക്കെയും, ദഹനത്തി-

നനിവാര്യമാണതു,മതാണിവിടെ നിൻ കവിത-

യെഴുതിടവെ ഭവിക്കുന്ന കർമം നിവൃത്തിയും!

അറിയുകയൊരാൾക്കുമിങ്ങാവുകില്ലന്യനായ് 

ഹൃദയലയലാസ്യമാടീടുവാൻ നീ നിന്നി-

ലുണരുവതൊക്കെയുമറിഞ്ഞു ജീവിക്കണം!

അറിവു നെറിവിൽ നിറഞ്ഞാകുമ്പൊഴാട്ടവും

ഉറവയിലുറങ്ങുന്ന ധാരയെയുണർത്തലാം!

അറിയുക നിനക്കു നിറവേകിടും ധ്യാനമായ്

ഒഴുകും ഗുരുത്വം ലഘുത്വമാക്കും ലയം!

അറിയുക നിനക്കിവിടെ നിന്നിലൂടെന്നിലേ-

ക്കൊഴുകിവരുവാൻ നിത്യമരുളും ക്ഷണം ക്ഷണം!

ക്ഷണകവിതയാമിതിൽ നിത്യം നിറഞ്ഞിടിൽ

നിറപറ,യിതിൽ നിന്റെ ധന്യതയാം ധനം!