ജീവനം

നുണവഴിയില്‍നിന്നു കിട്ടുന്നവയ്ക്കില്ല നിന്‍
തുണയാകുവാന്‍ ത്രാണി, നേര്‍വഴിയിലൂടെയേ
ഇനി നീ ചരിക്കേണ്ടതുള്ളു, നിന്‍ ജീവനം
ഇനിയെന്റെ ധര്‍മ്മമാണെന്നറിഞ്ഞീടുക!

മാലയില്‍ പൂവു നീ

ചിലതനര്‍ഹമായ് നീ നേടി പോകണം
പലതതിന്‍ ഫലമായെന്നു നിന്‍ വിധി!
വിധിയെ ധിക്കരിച്ചെങ്ങുമെത്തില്ല നീ!!
വിഫലയത്‌നം നടത്തേണ്ട നീയിനി!!!

അറിയുവോനാണു നീ, നിന്റെ ജന്മവും
അറിവിലേറ്റാതെ ചെയ്തിടും കര്‍മ്മവും
ചരടുകള്‍ തീര്‍ത്തിടു,ന്നതില്‍ ബന്ധി നീ,
ഒരു മലര്‍മാലയില്‍പ്പെട്ട പൂവു നീ!

ചതിയിതെന്നോര്‍ത്തിടായ്കിലേ തിന്മതന്‍
കണിക പോലുമേശാതെ നീ ബോധമാം
കടലിലേക്കു വീഴും ജീവധാരതന്‍
ചരിതവും ചാരിതാര്‍ഥ്യവും കണ്ടിടൂ!!!

ഇതു നിരര്‍ഥകമല്ല, മൗനാര്‍ദ്രമാം
കവിതതന്‍ ബീജമാണി,തുന്മാദിതന്‍
കവനകൗതുകം പോലെയല്ലിന്നു നീ
ഹൃദയസിന്ധുവില്‍ ബാഷ്പമാണോര്‍ക്കുക!!

സകലതും നീയറിഞ്ഞിടും, നിന്നിലെന്‍
ശകലമുണ്ടുജ്വലിച്ചിടാന്‍, നിന്നിലെ
സ്മൃതിപഥങ്ങളില്‍ മൗനമായ് വന്നു നിന്‍
അറിവിലാനന്ദസിന്ധു തീര്‍ക്കുന്നു ഞാന്‍!!

ഒരു ജന്മദിനാശംസ

(ഒരാശംസാ കാര്‍ഡില്‍നിന്ന് - പരിഭാഷ) 

നിന്റെ സ്വപ്നങ്ങള്‍ നവോന്മേഷദായിയായ്
നിന്നാത്മദാഹം ശമിപ്പിച്ചിടാന്‍

നിന്റെ മോഹങ്ങള്‍ യാഥാര്‍ഥ്യശൃംഗത്തിലെ
നിന്റെ ലക്ഷ്യങ്ങളെത്തിപ്പിടിക്കാന്‍
നിന്റെ സുശോഭനകാലത്തിലേക്കു നിന്‍
നിര്‍വിഘ്‌നയാത്ര തുടര്‍ന്നിടാനും
നിന്നിച്ഛയൊത്തു നീയാഗ്രഹിക്കുംവിധം
നിന്‍ ജീവിതം വിടരട്ടെ നിത്യം!

ദൈവവും കവിയും

ദൈവം


നീയറിയുന്ന ഞാനല്ല ഞാന്‍, നിന്നിലെ
നീയറിയുന്ന നിന്നുള്ളിലുള്ളെന്റെയീ
നിര്‍മ്മമ, നിസ്സംഗഭാവമല്ലല്ല ഞാന്‍!
നീ വികാരാര്‍ദ്രമീ വീണ, ഞാനോ വിരല്‍!!


കവി
ഞാനറിയുന്ന ഞാനാരുമല്ലെങ്കിലും
ജ്ഞാനമുണ്ടെന്നിലും ആനന്ദസാരമായ്!
ഈ നിമിഷാര്‍ദ്രസംഗീതമായ്, സങ്കല്പമായ്, നവോന്മേഷമേകും പ്രജ്ഞയായ്, ലയ-
ഭാവതരംഗമായ്, നിന്റെ നിര്‍ന്നിദ്രമാം
കാവ്യതരംഗിണിയില്‍ ഹര്‍ഷവര്‍ഷമായ്
ഞാന്‍ പെയ്‌തൊഴിഞ്ഞിടും നിന്നിലൂടാനന്ദ-
സാഗരതീരത്തണഞ്ഞു മായ്ക്കും മൃതി!!

രണ്ട് അരാഷ്ട്രീയ പദ്യങ്ങള്‍ - ആമാദ്മിയും ആപ്പും

ആമാദ്മി
 
ആമാദ്മിയാമയാ,ണതിനാവു, മിവിടെയും 
ആമാശയം നിറച്ചിവിടുറങ്ങീടാതെ-
യാവില്ലയെന്നുള്ളവസ്ഥയില്‍ മത്സരി-
ച്ചീടുന്ന മുയലിനെത്തോല്പ്പിക്കുവാന്‍, ദൃഢം!
 
ആപ്പ് 
ആപ്പാപ്പുതന്നെയാ,ണതു തടിയറത്തിടും
വാനരന്മാര്‍തന്നെ വച്ചതാ, ണൂരുവാന്‍
നോക്കുന്ന വാനരകുമാരനുചതഞ്ഞര-
ഞ്ഞീടുവാന്‍ വാല്‍മാത്രമല്ലെന്നു കാണുക!

ജോണി ജെ പ്ലാത്തോട്ടത്തിൻറെ 'സാംഖ്യദർശനം'

 ശ്രീ ജോണി ജെ പ്ലാത്തോട്ടം എഴുതി ഈയിടെ പ്രസിദ്ധീകരിച്ചിട്ടുള്ള 'ദൈവത്തിന്റെ അജണ്ടയില്‍ പ്രണയമില്ല' എന്ന കവിതാസമാഹാരത്തിലെ 

'സാംഖ്യദർശനം' എന്ന കവിത കാവ്യകേളി സുഹൃത്തുകൾക്കൊന്ന് പരിചയപ്പെടുത്താനാണ് ഈ കുറിപ്പ്.  

ഈ കവിതാസമാഹാരം ഇന്ന്  (ജനുവരി 12- ഞായർ) രാവിലെ 10 മുതല്‍ 1 വരെ പാലാ സഹൃദയസമിതിയിൽ ചര്‍ച്ച ചെയ്യുന്നു. സ്ഥലം: കൊട്ടാരമറ്റം സഫലം 55+ ഹാൾ

കണക്കും കവിതയും വിരുദ്ധധ്രുവങ്ങളിലുള്ള രണ്ടു വിപരീതപ്രതിഭാസങ്ങളാണെന്നാണ് പൊതുവേ കരുതപ്പെടുന്നത്. എന്നാൽ അത് രണ്ടു കാന്തങ്ങളുടെ വിപരീതധ്രുവങ്ങളാണെന്നു ഗ്രഹിക്കാൻ കഴിയുന്ന ഒരു കവിമനസ്സിനേ സാംഖ്യദർശനം എന്ന കവിത എഴുതാനാവൂ. കാലാകാലങ്ങളായി അക്കങ്ങൾക്ക് മനുഷ്യൻ കല്പിച്ചുകൊടുത്തിട്ടുള്ള സാംസ്കാരിക സങ്കല്പസ്വരൂപങ്ങളിലേക്ക് സഹൃദയരുടെ കണ്ണുകൾ തുറന്നുതരുന്ന ഗുരുവചനങ്ങളാണ് ലഘുവെന്നുതോന്നുന്ന ഇതിലെ ഓരോ ഉൾക്കാഴ്ചകളും. കൂട്ടലുകളുടെയും കിഴിക്കലുകളുടെയും ലോകത്തുനിന്ന് സംഖ്യകളെ വിമോചിപ്പിച്ച് വൃത്തനിബദ്ധമായ കവിതകളിലെ മാത്രാവ്യത്യാസങ്ങൾക്കപ്പുറത്തെത്തിക്കുന്പോൾ അക്കങ്ങളുടെ അക്ഷരമഹിമ അനുവാചകൻറെ ചുണ്ടുകളിൽ പുഞ്ചിരി പകരുന്നതെങ്ങനെ എന്നറിയണമെങ്കിൽ ഈ കവിത വായിച്ചു നോക്കുകതന്നെവേണം. താനറിയാതെ തൻറെ ചുണ്ടുകളിൽ വിരിയുന്ന ആ പുഞ്ചിരി ഹൃദയങ്ങളിൽ ജ്ഞാനവും പകരുന്നതെങ്ങനെ എന്ന് ഓരോ അനുവാചകനും സ്വയം അനുഭവിച്ചറിയുന്പോഴേ ഈ കവിതകൾ പൂർണമാകൂ.  അതിനാൽ വ്യാഖ്യാനങ്ങൾക്കതീതമായ കവിതയാണിതിലുള്ളത് എന്നു മാത്രം വ്യക്തമാക്കിക്കൊണ്ട് ഈ കവിത ഒന്നു പകർത്താൻ മാത്രമേ ഞാനിവിടെ തുനിയുന്നുള്ളു.

7. സാംഖ്യ ദര്‍ശനം

ഒന്ന്
പൂര്‍ണതയുടെ ഏകകം
ന്യൂമറോളജിയില്‍ സൂര്യന്‍
ഒന്നാമന്മാരില്‍ ഒന്നാമന്‍
ആദിയും അനന്തതയും ഒന്നില്‍

പക്ഷേ
അപകര്‍ഷതയുടെ അശ്വത്ഥാമാവ്
ഏകാകി
ഒരു കൂട്ടിന്, ഇണയ്ക്കുവേണ്ടി ഉഴലുന്നവന്‍
പ്രലോഭനത്തിന്റെ ആദിബിംബവും ഇവന്‍
'ഒന്ന്, ഒരിക്കല്‍...ഒരിക്കല്‍മാത്രം' !....എന്നും
'ഒരിക്കല്‍കൂടി..........പ്ലീസ് ഒരിക്കല്‍കൂടി' ....എന്നും
'ഈ ഒരിക്കല്‍കൂടി മാത്രം' ..........എന്നും,
കൊതിയുടെ മന്ത്രമായി
ശാപമോക്ഷമില്ലാത്ത അലച്ചില്‍

രണ്ട്
ഹായ്!
ശാന്തി, ശാന്തി
തുണയ്ക്കുവേണ്ടിയുള്ള ആദിമദാഹം
ശമിപ്പിക്കപ്പെട്ടിരിക്കുന്നു
മാത്രമോ,
രണ്ടു സൂര്യന്മാരെ ആര്‍ക്കു വെല്ലാനാകും?
ഈ ദ്വയം അദ്വിതീയമെന്നു ജാതകവും

പക്ഷേ....
രണ്ടു പൂര്‍ണതകള്‍ ചേര്‍ന്നുപോകില്ലെന്നു സ്ഥിതിസംഹിത
മറ്റേ ഒന്നു തന്നോളം വരില്ലെന്ന തോന്നല്‍
- ഈഗോ ക്ലാഷ് എന്നു മനഃശാസ്ത്രവ്യാഖ്യാനം-
അനുയോജ്യമായൊരൊന്നിനെ കണ്ടെത്തുകതന്നെ
ആൗ േമഹമ െ!
ദൈവം യോജിപ്പിച്ച ഈ സയാമീസ് ഇരട്ടകള്‍ക്ക്
വേര്‍പെടാന്‍ വിധിയില്ല

മൂന്ന്
മൂന്നായാല്‍ പരിഹാരമായെന്ന്
ഈശ്വരന്മാര്‍ പോലും നിനച്ചിരുന്നു
അതിനാല്‍ തന്നെ
ത്രിമൂര്‍ത്തികള്‍, ത്രിദോഷങ്ങള്‍, ത്രികോണങ്ങള്‍
മുക്കാലി, മുക്കൂട്ട്, മൂന്നാം നാള്‍, മൂന്നുതരം;
എന്നാല്‍, കുഴപ്പം മൂര്‍ഛിക്കുകയായിരുന്നു
താളം ത്രിപുടയില്‍ മുടന്തി
ചലന സന്മാര്‍ഗ്ഗം പിഴച്ചു
മൂന്ന്, പ്രകൃതിവിരുദ്ധസംഖ്യ!
കലഹവും 'ഹോമോ'യുടെ ഉത്പത്തിയും ഫലം

നാല്
'ഒരു വശവുമില്ലാത്തവന്‍' എന്നു സ്വയം ചിലര്‍;
പക്ഷേ
സ്ഥാവരജംഗമങ്ങള്‍ക്കെല്ലാം
വശം നാലും നല്‍കപ്പെട്ടിരിക്കുന്നു

എങ്കിലും നാലിനെ ഒന്നു സൂക്ഷിച്ചേക്കുക
നാല്‍വര്‍ സംഘം, നാലാള്‍ നാലുവഴി
മാത്രമോ, നാലുനേരത്തെ വിശപ്പും!

നാലുകെട്ടെ,ന്നാല്‍
ഹൈന്ദവവും ഇസ്ലാമികവുമായി
നാനാര്‍ത്ഥങ്ങള്‍
ലളിതമായ നിരൂപകഭാഷയില്‍,
'തുലോം വ്യതിരിക്തമായ അര്‍ത്ഥോത്‌ല്പാദനങ്ങള്‍!'

എവിടെ നാലുണ്ടോ
അവിടെ സന്തുലിതമുണ്ട്
ഇതാകാം പ്രകൃതിയും നാലും തമ്മില്‍
കട്ടിലിനും കാറിനും പന്തലിനും പശുവിനും
കൃത്യമായും നാലേകാല്

എന്നിട്ടും
നാല്‍ക്കാലി എന്ന്
പുച്ഛം കലര്‍ന്ന ഒരു പ്രയോഗമുണ്ട്
ഉണ്ടാകും!
പണ്ട് ഇദ്ദേഹവും നാലുകാലിലായിരുന്നല്ലോ.

അഞ്ച്
'ആറാം പന്തി'നെക്കാള്‍
പേരും പെരുമയുമുണ്ട് 'അഞ്ചാംപത്തി'ക്ക്
പക്ഷേ, ചതിയനെന്നു ചരിത്രം.
ചരിത്രം തിരുത്തിയിട്ടും കുറിച്ചിട്ടും
തിരുത്തിക്കുഴിച്ചിട്ടിട്ടും
പാവം അഞ്ചിനു പാഠഭേദമില്ല

ചിലപ്പോള്‍,
ചരിത്രവും ചാരിത്രവും പോലെ
കടലും കടലാടിയുംപോലെ
അടിയും അടിയോടിയും പോലെ
അടുക്കളയും ഇടിക്കുളയും പോലെ
വി.കെ.എന്നും ഈ.കെ. എന്നുംപോലെ
ഏ.കെ. ജിയും എല്‍.കെ.ജിയും പോലെ
അഞ്ചിന് അഞ്ചാംപത്തിയെക്കുറിച്ച്
മനസ്സറിവേ കാണില്ല!

ആറ്
പാവപ്പെട്ടവര്‍ക്കും
ഒരു സംഖ്യ;
എന്നാല്‍
ആറെന്നു പറയാനൊരിണ്ടല്‍
അരഡസനെന്നും അര്‍ദ്ധവാര്‍ഷികമെന്നും
പത്രാസ് പറഞ്ഞ് ചമ്മലകറ്റുന്നു


അഞ്ചക്കങ്ങള്‍ക്കു ജ്യേഷ്ഠന്‍
പക്ഷേ, പറഞ്ഞിട്ടെന്ത്
കാര്‍ഡ്‌സു കളിയില്‍പ്പോലും അവഗണന

ആറും അറുപതും എന്ന്
പ്രാസത്തിലും ഒരു പാരപ്രയോഗം

ഏഴ്
ഏവര്‍ക്കും അരുമയാനയേഴ്
എല്ലാം തികഞ്ഞ കലാകാരന്‍
സ്വരവും വര്‍ണ്ണവും
പാരവും പാരാവാരവും
അവനു വിധേയം

ഏഴെഴുപത് എഴുനൂറും എന്നു ക്ഷമയുടെ അവതാരം
എന്നിട്ടും
ഏഴാം കൂലിയെന്ന്
കേള്‍ക്കാതൊരു വിളിപ്പേര്;
അതങ്ങനെയാണല്ലോ
അസൂയ!
അങ്കുശമില്ലാത്ത അസൂയ

എട്ട്
പേരില്‍ത്തന്നെ തട്ടുപൊളിപ്പന്‍
കോലാഹലപ്രിയന്‍
എട്ടരക്കട്ടയെന്നോര്‍ത്താല്‍ മതിയല്ലോ
അസുരവാദ്യമായിരിക്കണം പത്ഥ്യം
-വായ്പാട്ടില്‍ എം.എസ്. വിയും സൗന്ദരരാജനും

സാഹസികരായ സ്ത്രീകള്‍
എട്ടാം മാസത്തിലും പ്രസവിക്കുന്നു
എട്ടുദിക്കിലും ഈ കുട്ടന്മാര്‍
സൈ്വരം തരില്ലെന്നു പൂര്‍വ്വികര്‍
'എട്ടുവീട്ടില്‍ പിള്ള' മാരും
ശബ്ദപ്രതാപികളാണല്ലോ.

ഒന്‍പത്
അക്കങ്ങളുടെ യുധിഷ്ഠിരനാണ്.
പക്ഷേ, ആര്‍ക്കുമത്ര മതിപ്പില്ല
ചീട്ടുകളിയിലെ 'പരീല്‍' കണക്ഷനാകാം കാരണം
('ഇസ്‌പേഡ് ഒന്‍പത്' ഒളിപ്പിച്ചുവച്ച്
തല്ലുവാങ്ങിയവര്‍ ധാരാളം)

എന്തോ, ഒന്‍പതിനോട്
എനിക്കുമില്ല താത്പര്യം
- 'ഒന്‍പതാം പ്രമാണ' മാകില്ല കാരണം!
ചിലപ്പോള്‍ ചിലര്‍ക്ക്
ഒന്‍പതൊരു ഭാരിച്ച മാസം!
എന്നാല്‍,
ഫലമറിയുന്നതും
ഭാരമൊഴിയുന്നതും
ഈ ആശ്വാസനമ്പരില്‍

പൂജ്യം
അലഞ്ഞുനടക്കുന്ന
ഒരനാഥച്ചെക്കന്‍!
-കൂലിയില്ലാത്ത ജോലികള്‍,
കടയിലേക്കോടാനും
കത്തുപോസ്റ്റു ചെയ്യാനും-
സദാ വണ്ടിച്ചക്രമോടിച്ചു പോകും

ചിലര്‍ അവനെ വച്ചു
ലക്ഷങ്ങളുണ്ടാക്കുന്നു
മണിമാളികകൡ കൂട്ടിക്കൊണ്ടുപോകുന്നു
അയനത്തിന്റെയും ആവേഗത്തിന്റെയും
ചിഹ്നമായി,
അജ്ഞതയുടെയും അനാഥത്വത്തിന്റെയും
സ്വാതന്ത്ര്യമാസ്വദിക്കുന്ന പാവം കുട്ടി,
അവന്‍ വീണ്ടും തെരുവിലെത്തുന്നു,

'ജിപ്‌സികളുടെ ജനുസില്‍പ്പെട്ടവന്‍
ഇല്ലായ്മയുടെ സൗന്ദര്യംപേറുന്നവന്‍
ദാര്‍ശനിക മാനങ്ങളുള്ളവന്‍...'
എന്നു താടിക്കാരായ ബുദ്ധിജീവികള്‍

ഏതോ നിഗൂഢതയവനെ ചൂഴ്ന്നുനില്‍ക്കുന്നു
അവന്റെ പിന്നിലാരോ ഉണ്ട്
ദൈവമോ പിശാചോ?

'കോഴിമുട്ടപ്പാറ'യിലെ നസ്രാണിവിഷാദയോഗം

From  
http://sahryudayasamithi.blogspot.in/ 

(പുസ്തകാസ്വാദനം - ജോസാന്റണി)
കവി
വര്‍ഗീസാന്റണി (phone : 9526335648)
ഡിസി ബുക്‌സ് കോട്ടയം
'
നസ്രാണിവിഷാദയോഗം' എന്ന ശ്രീ വര്‍ഗീസാന്റണിയുടെ കവിതാസമാഹാരത്തിന്റെ 'കോഴിമുട്ടപ്പാറയിലെ വെളിപ്പെടല്‍' എന്ന ആമുഖത്തില്‍ ശ്രീ വര്‍ഗീസാന്റണി വ്യക്തമാക്കിയിട്ടുള്ള കാവ്യസത്യം ഇതാണ്: ''പ്രകൃതിയിലെ അന്തമറ്റ രൂപങ്ങളാണ് അന്തമറ്റ കാവ്യരൂപങ്ങളായി മാറുന്നത്. സ്ഥൂലപ്രകൃതിയില്‍ നിന്ന് സൂക്ഷ്മപ്രകൃതിയിലേക്കുള്ള സഞ്ചാരമാണ് കവിത......
കോഴിമുട്ടപ്പാറ തൃശൂരിലെ വെള്ളിക്കുളങ്ങരയിലുള്ള ലോകാക്ഭുതമാണ്.
......അസാധ്യമായ പലതും മനുഷ്യന്‍ സാധിച്ചിട്ടുണ്ട്. എന്നിട്ടും ഇതുവരെ ഒരു കോഴിമുട്ട ഓരംകുത്തി നിറുത്താന്‍ മനുഷ്യനു സാധിച്ചിട്ടില്ല കോഴിമുട്ടയുടെ വെല്ലുവിളി പ്രകൃതി ഏറ്റെടുത്തു പ്രകൃതിയുടെ കരവിരുതിന്റെ, കരള്‍വിരുതിന്റെ, പ്രകടനമാണ് കോഴിമുട്ടപ്പാറ.
......കോഴിമുട്ട ഫലിതമല്ല. പക്ഷേ, കോഴിമുട്ടപ്പാറ ഫലിതമാണ്. മുട്ടയും പാറയും തമ്മിലുള്ള പൊരുത്തക്കേടാണ് അതിനെ ഫലിതമാക്കുന്നത്......കോഴിമുട്ട അത്ഭുതമല്ല. പക്ഷേ, കോഴിമുട്ടപ്പാറ അത്ഭുതമാണ്. പേരില്‍ കുടികൊള്ളുന്ന ഹാസ്യം നേരില്‍ അത്ഭുതമായി മാറും. വേണമെങ്കില്‍ വീരവും രൗദ്രവും അതില്‍ ദര്‍ശിക്കാം. ശൃംഗാരം അതിലില്ലെങ്കിലും അതിനരികിലുണ്ട്.മേല്‍പ്പറഞ്ഞ രസങ്ങളിലൂടെയെല്ലാം കടന്നുപോയി കുറച്ചുനേരം കണ്ണടച്ചിരുന്നാല്‍ ശാന്തരസവും ഉണരും. അതുകൊണ്ട് കോഴിമുട്ടപ്പാറ ഒരു മഹാകാവ്യമാണ്.''
വര്‍ഗീസാന്റണിയുടെ കവിത വര്‍ഗീസാന്റണിയുടെമാത്രം ശൈലിയിലുള്ള കവിതയാണ്. ഇതിനെ ഒരു കള്ളിയിലും ഇട്ടുവയ്ക്കാവുന്നതല്ല. ഇവ കാല്പനികമോ ആധുനികമോ അത്യന്താധുനികമോ ആധുനികോത്തരമോ ഉത്തരാധുനികമോ ഒന്നുമല്ല. ഓരോ ആസ്വാദകന്റെയും അനുഭവങ്ങളോടും അറിവുകളോടും പ്രതിപ്രവര്‍ത്തിച്ച് ഉരുത്തിരഞ്ഞുവരേണ്ട അര്‍ഥതലങ്ങളാണ് ഓരോ കവിതയിലും ഉള്ളത്.
ആദ്യവായനയ്ക്ക് സുലളിതമെങ്കിലും ആലോചനാമൃതം എന്നു നിസ്സംശയം വിശേഷിപ്പിക്കാവുന്ന കുറെ വരികള്‍ ഇവിടെ ഉദ്ധരിച്ചാല്‍ മതി എന്നാണ് ആദ്യം തോന്നിയത്. താഴെ കൊടുക്കുന്ന വരികള്‍ ഒന്നുകൂടി വായിച്ചപ്പോള്‍ ഞാനൊരു പ്രതിസന്ധിയിലായി.
''കൊതുകുകടി മനുഷ്യപക്ഷവീക്ഷണമാണ്.
കുടിയാണ് കൊതുകുപക്ഷം.
ചോരകുടിച്ചാലും വര്‍ഗശത്രുവിനെ ഉന്മൂലനം ചെയ്യുകയില്ലവ, ഉന്മീലനം ചെയ്യും.
കൊഴിഞ്ഞൂ ഉന്മൂലനസിദ്ധാന്തം.
വിരിഞ്ഞൂ ഉന്മീലനത്തിന്റെ ഉപനിഷത്ത്.''
ആധുനികോത്തരകവിതയുടെ വാച്യാര്‍ഥം കൃത്യമായറിയാന്‍ ശബ്ദതാരാവലിയില്‍ നോക്കാന്‍ ഇടയാകരുതല്ലോ. ഉന്മീലനം എന്ന വാക്കിന്റെ അര്‍ഥമറിയാന്‍ എനിക്ക് ശബ്ദതാരാവലിയില്‍ നോക്കേണ്ടിവന്നു. കണ്ണുതുക്കല്‍, ഉണരല്‍ എന്നാണ് അതിനര്‍ഥം. വലിയ അര്‍ഥതലങ്ങളുള്ള വാക്കാണിത്. അപ്പോള്‍ ഇവിടത്തെ കൊതുക് വെറും കൊതുകായിരിക്കില്ല. ഈ ഏതാനും വരികള്‍ക്കുള്ളില്‍, കൃത്യമായി വിശദീകരിക്കാനാവാത്ത അഗാധമായ ചില ധ്വനിതലങ്ങള്‍, മുട്ടയിലെ കരുപോലെ ഉണ്ട്. എനിക്കു കൂടുതല്‍ വിശദീകരിക്കാനാവുന്നില്ല.
അതേ. ഈ പുസ്തകം 'കോഴിമുട്ടപ്പാറ'പോലെതന്നെ ഒരു മഹാകാവ്യമാണ്. പ്രകൃതി തന്നിലുള്ള ഫലിതവും അത്ഭുതവും സ്വയം നോക്കിക്കണ്ടപ്പോള്‍ കോഴിമുട്ടപ്പാറ ഉണ്ടായതുപോലെതന്നെയാണ് വര്‍ഗീസാന്റണി പ്രകൃതിയിലുള്ള ഫലിതവും അത്ഭുതവും നോക്കിക്കണ്ടപ്പോള്‍ ഈ പുസ്തകത്തിലെ കവിതകളോരോന്നും ഉണ്ടായത്.
ആമയെപ്പറ്റിയുള്ള നാലു കവിതകളിതിലുണ്ട്. 'കൂര്‍മ്മാധിപത്യം', 'ആമ & അവതാരക', 'ഗ്രാന്റ് ഫിനാലെ', 'വീടുണ്ടാക്കി മുടിഞ്ഞ ആമയില്ലല്ല. ആമ എന്ന പ്രതീകത്തിന് നാലുകവിതകളിലും വ്യത്യസ്തമായ ഊന്നലുകളാണ് എന്നു നാം പ്രത്യേകം ശ്രദ്ധിക്കണം. ആദ്യകവിതയില്‍ വേദങ്ങള്‍ വീണ്ടെടുത്ത ആദ്യാവതാരമായ ആമ പറയുന്നു: ''ഞങ്ങള്‍ വഹിക്കുന്ന അറിവിന്റെ മഹാഭാര(ത)ത്തെയാണ് മന്ദതയെന്നും നിസ്സംഗതയെന്നും നിങ്ങള്‍ തെറ്റിദ്ധരിക്കുന്നത്.''
രണ്ടാമത്തെ കവിതയില്‍ ആമ പറയുന്നു: ''പരാജയത്തിലുമുണ്ടൊരു സാധ്യത. മുയല്‍ ആരംഭിച്ചത് പൂജ്യം ശതമാനം പരാജയസാധ്യതയില്‍നിന്നാണ്. ഞാന്‍ ആരംഭിച്ചത് പൂജ്യം ശതമാനം വിജയസാധ്യതയില്‍നിന്നും. പൂജ്യം എന്നെ ഹരം കൊള്ളിക്കുന്നു.''
മൂന്നാമത്തെ കവിതയില്‍ ഉള്ള രണ്ട് ഉള്‍ക്കാഴ്ചകള്‍ കാണുക: ''ആമയിലെ 'ആ' ലോപിച്ചും 'മ' ഇരട്ടിച്ചുമാണ് അമ്മ എന്ന വാക്കുണ്ടായത്.''
''ആമദേഹവും മുയല്‍മനവും തമ്മിലുള്ള അനാദിയായ മത്സരത്തില്‍ ആമ ഒരിക്കലും ജയിച്ചിട്ടില്ല.''
നാലാമത്തെ കവിതയിലെ ഏതാനും ഉള്‍ക്കാഴ്ചകള്‍ കൂടി കാണുക:
''ഗുഹയിലോ മരച്ചുവട്ടിലോ അല്ല വീടിന്റെ ഉത്പത്തി ആമയുടെ മുതുകിലാണ്.
....വീടു മുതുകിലുള്ളവന് എങ്ങുമെത്താന്‍ ധൃതിയില്ല...
വീടും വീട്ടുകാരനും രണ്ടെന്ന ദൈ്വതമില്ലാത്തതതിനാല്‍ ഗൃഹാതുരത്വമില്ല.''
തുറന്നു പറയട്ടെ, ഈ പുസ്തകം വാങ്ങാനും വായിക്കാനും വായനക്കാര്‍ക്കു പ്രചോദനമേകുക എന്നതാണ് ഈ കുറിപ്പിന്റെ ഉദ്ദേശ്യം. അതുകൊണ്ട് എനിക്കു ശ്രദ്ധേയമെന്നു തോന്നുന്ന കുറെ വരികള്‍ ഉദ്ധരിക്കുകയേ ഞാന്‍ ഇനിയും ചെയ്യുന്നുള്ളു.
''ഒരൊറ്റ വാക്കേയുള്ളൂ, അല്ല, ശബ്ദമേയുള്ളൂ - കൊക്കൊക്കോ
അര്‍ഥശൂന്യം, അതിനാല്‍ പ്രതിധ്വനിക്കും ഏതര്‍ഥവും.'' (മുട്ടയിട്ടാല്‍ ആര്‍ക്കമിഡീസാകും)
''കടുകോളം കാരണത്തില്‍നിന്ന് കടലോളം കാര്യങ്ങളുണ്ടാകുന്നതിനോളം അത്ഭുതമെന്തുണ്ട്?
മറിച്ചാകുന്നതിനോളം ചിരിയെന്തുണ്ട്?'' (തലനാരിഴയുടെ വ്യത്യാസങ്ങള്‍)
''അവസാന അത്താഴത്തിന്റെ ആസന്ന ദുരന്തമൂര്‍ച്ചയിലേക്ക്
ഓര്‍ക്കാപ്പുറത്തൊരു കോഴി പറന്നാല്‍ ചിരിക്കാതിരിക്കുന്നതെങ്ങനെ?''(കോഴി മൂന്നുവട്ടം കൂകുംമുമ്പ്)
''ഭക്ഷണമാണഖിലസാരമൂഴിയില്‍ ഭക്ഷണമില്ലാക്ഷണമില്ല'' (അഖിലസാരമൂഴിയില്‍)
ചഞ്ചലഭാഷിണി*യാല്‍ അചലങ്ങള്‍പോലും ചഞ്ചലമായ്''
*മൊബൈല്‍ഫോണ്‍ (പരിധിക്കകത്തോ പുറത്തോ)
''ഫ! ചൂലേയെന്നു മാനക്കേടില്‍ മുക്കിയ രൂപകമോങ്ങി അകത്തുള്ളവള്‍
കുറ്റിച്ചൂലളന്നു, അധഃപതനത്തെ.'' (തെങ്ങിന്റെ ആത്മഗതം)
''ആത്മഹത്യ ചെയ്യാന്‍ മാത്രമേ ഞങ്ങള്‍ താഴേക്കു ചാടാറുള്ളൂ
എന്നു പറഞ്ഞപ്പോള്‍ നീ കാടുമുഴക്കിച്ചിരിച്ചു.'' (ജലപതനം)
''കടിച്ചു ചോരകുടിച്ചു കൊല്ലുന്നു കൊതുകോളം തെറ്റുകള്‍
ആനയോളം ശരികളെ.'' (സ്ത്രീയേ എനിക്കും നിനക്കും)
''ഏതിന്‍ ഷട്ടറിടും രണ്ടാം വരവില്‍?
നിര്‍ഗോളീകരണം, ആഗോളതാപശമനം, പില്‍ക്കാല സോഷ്യലിസം?''
('സെന്‍' തോമസിന്റെ സുവിശേഷത്തില്‍ എഡിറ്റര്‍ ചെയ്തത്)
''മനുഷ്യനു മനുഷ്യനെയും ദൈവത്തെയും പിശാചിനെയും മാറിമാറി വിളിക്കാം
ദൈവത്തിനു വിളിക്കാന്‍ ദൈവമില്ല, മനുഷ്യനേയുള്ളൂ.'' (വിശ്വവിഖ്യാതമായ ചെവികള്‍)
''എവറസ്റ്റ് കീഴടക്കുന്നവര്‍ എവറസ്റ്റിനു കീഴടങ്ങും
ഉലകമേ ചൂടിക്കരുത് ജേതാവിന്റെ മുടി
പരാജയശ്രീലാളിതന്‍ ഞാന്‍'' (എവറസ്റ്റാരോപണം)